Subodh Lal Saqi
aankh chura kar nikal ga.e hushyari ki
samajh ga.e tum bhi mauqe ki bariki
dariya paar safar ki jab tayyari ki
mausam ne har baar baḌi ghaddari ki
ab lagta hai muḌ ke dekh to sakta tha
aḳhir had bhi hoti hai ḳhuddari ki
baar baar akash ne ki atish-bazi
raat manaya ham ne jashn-e-tariki
shayad sirf ujala kar ke bujh jaa.e
shayad niyyat badal jaa.e chingari ki
dhaḌkan ko laghzish ki chhuT nahin bilkul
dil ne itni saḳht hidayat jaari ki
Leave a Reply