Shaad Aarfi
chahte hain ghar buton ke dil men ham
hain junun ki aḳhiri manzil men ham
giit gaate hain qafas manzil men ham
koste jaate hain lekin dil men ham
ye to mat mahsus hone dijiye
ajnabi hain aap ki mahfil men ham
mai-kade ke chor-darvaze bhi hain
aa to jaa.en shaiḳh ki manzil men ham
ḳhud-farebon ko payam-e-agahi
mubtala hain sa.i-e-la-hasil men ham
duur se aata hai mub.ham sa javab
den use avaz jis manzil men ham
rok len palkon pe aansu ki tarah
kya samo den mauj ko sahil men ham
sochiye aḳhir vo kya halat hain
ja rahe hain kucha-e-qatil men ham
ji na maila kijiye fariyad par
hain pasheman ap-apne dil men ham
ham ghalat ruj.han rakhte the ki aap
aap se puchhenge mustaqbil men ham
na-shanasan-e-adab ke haath se
‘shad’-sahib hain baḌi mushkil men ham
Leave a Reply