ahmad-shanas

Lamha Lamha Roz O Shab Ko Der Hoti Jaegi

lamha lamha roz o shab ko der hoti jaegi

ye safar aisa hai sab ko der hoti jaegi

sabz lamhon ko ugane ka hunar bhi sikhna

varna is rang-e-talab ko der hoti jaegi

is hava men aadmi patthar ka hota jaega

aur rone ke sabab ko der hoti jaegi

dekhna tera havala kuchh se kuchh ho jaega

dekhna sher o adab ko der hoti jaegi

rafta rafta jism ki parten utarti jaengi

kaghzi naam o nasab ko der hoti jaegi

aam ho jaega kaghaz ke gulabon ka chalan

aur khushbu ke sabab ko der hoti jaegi

saara manzar hi badal jaega ‘ahmad’ dekhna

mausam-e-rukhsar-o-lab ko der hoti jaegi

More Poems

Leave a Comment