ghaneri chhanv ke sapne bahut dikha.e ga.e
saval ye hai ki kitne shajar ugaa.e ga.e
mili hai aur hi ta.abir aa ke manzil par
vo aur ḳhvab the raste men jo dikha.e ga.e
mire lahu se mujhe munhadim karaya gaya
dayar-e-ghair se lashkar kahan bula.e ga.e
diye bana ke jala.i thiin ungliyan ham ne
andheri shab ki adalat men ham bhi laa.e ga.e
falak pe uḌte huon ko qafas men Daala gaya
zamin pe rengne valon ko par laga.e ga.e
hamare naam ki taḳhti bhi un pe lag na saki
lahu men gundh ke miTTi jo ghar bana.e ga.e
mile the pahle se likkhe hue adalat ko
vo faisle jo hamen ba.ad men suna.e ga.e
tamam sa.ad sitare bigaḌ ga.e ‘az.har’
sulagti ret pe jab za.iche bana.e ga.e
Leave a Reply