Poet
kis sadgi se chhoḌ diya hai bahav par
halan ki ham savar hain kaghaz ki naav par
ham khilkhila ke hanste hain har taaza ghaav par
kuchh log mo’tariz hain isi rakh-rakhao par
ye aag bhi unhin ki laga.i hui to hai
jo log haath taap rahe hain alaav par
shahr-e-suḳhan ka tarz-e-tijarat ajiib hai
bikte hain fikr-o-fan bhi to miTTi ke bhaav par
rahzan hain ahl-e-qafila hain aur gard-e-rah
rahbar ko chhoḌ aa.e hain pichhle paḌav par
ham bekason pe itna munasib nahin hai zulm
chinTa bhi kaaT leta hai akasr dabav par
mumkin nahin hai ishq ki baazi ko haar jaa.en
dil jaisi chiiz ham ne laga.i hai daav par
vo shaḳhs zindagi ki bulandi na chhu saka
vo jis ka saans phuul gaya ho chaḌhav par
‘ishrat’ ḳhulus-o-mehr-o-vafa dosti ki laaj
bikti hain saari chizen yahan ek bhaav par
Leave a Reply