Dil Ayubi
saare chaman ko dasht men tabdil kar ga.e
be-dard the jo ain javani men mar ga.e
malbus-e-ahl-e-hosh ka me.aar dekh kar
divane be-libas daraḳhton se Dar ga.e
shayad udasiyon pe taras aa gaya miri
kal raat shahr-e-jan men farishte utar ga.e
sunte hain un pe nuur barasta hai aaj tak
jin vadiyon se ho ke tire ḳhush-nazar ga.e
ham sar-phire bhi ḳhuub the ai ‘dil’ ki ishq men
namus-o-nang-o-nam bhi qurban kar ga.e
Leave a Reply