Tere Milne Se Hi Thanda dil-e-Atish-Fashan Hoga

tire milne se hi Thanda dil-e-atish-fashan hoga

zara si aanch hogi kam jo siine men dhuan hoga

chahakte hain ḳhayalon ke mire bulbul asiri men

ki teri yaad ke pinjre men un ka gulsitan hoga

agar shauq-e-bulandi hai to paida kar zamin apni

vagarna tu kahan hoga tira kya asman hoga

yahi to zindagani hai ye is dil men na jaegi

ki jis dil men sukun asudgi amn-o-aman hoga

ghulam us ki laTon ka hai nahin goron ka ye ‘aḳhtar’

kabhi azad kya dil ka mire hindostan hoga

Leave a Comment