Kale Safed Paron Wala Parinda Aur Meri Ek Sham

jab din Dhal jaata hai, suraj dharti ki ot men ho jaata hai

aur bhidon ke chhatte jaisi bhin-bhin

bazaron ki garmi, afra-tafri

motor, bas, barqi railon ka hangama tham jaata hai

chae-khanon nach-gharon se kam-sin ladke

apne ham-sin mashuqon ko

jin ki jinsi khvahish vaqt se pahle jaag uthi hai

le kar ja chukte hain

badhti phailti unchi himala jaisi taamiron par khamoshi chha jaati hai

theater tafrih-gahon men taale pad jaate hain

aur ba-zahir duniya so jaati hai

main apne kamre men baitha socha karta huun

kutton ki dum tedhi kyuun hoti hai

ye chitkabri duniya jis ka koi bhi kirdar nahin hai

koi falsafa koi painda aqdar nahin, meaar nahin hai

is par ahl-e-danish vidvan, falsafi

moti moti adaq kitaben kyuun likkha karte hain?

‘furqat’ ki maan ne shauhar ke marne par kitna kohram machaya tha

lekin iddat ke din puure hone se ik hafta pahle

‘nilam’ ke mamun ke saath badaun ja pahunchi thi

bi-bi ki sehnak konde fatiha-khvani

jang-e-siffin, jamal aur badar ke qisson

sirat-e-nabvi tark-e-duniya aur maulvi-sahab ke halve mande men kya rishta hai?

din to ud jaate hain

ye sab kaale par vaale bagule hain

jo hanste khelte lamhon ko

apne pankhon men muund ke ankhon se ojhal ho jaate hain

rahat jaise khvab hai aise insanon ka

jin ki ummidon ke daman men paivand lage hain

jaama ek taraf siite hain dusri janib phat jaata hai

ye duniya lamha lamha jiiti hai

‘maryam’ ab kapde seti hai

ankhon ki binai saath nahin deti ab

aur ‘ghazanfar’

jo rumal men laDDu bandh ke us ke ghar men phenka karta tha

aur us ki ankhon ki tausif men ghazlen likhva kar laaya karta tha

us ne aur kahin shadi kar li hai

ab apni lakdi ki taal pe baitha

apni kaj-rai aur javani ke qisse dohraya karta hai

taal se uth kar jab ghar men aata hai

beti par qadghan rakhta hai

nae zamane ki aulad ab vaisi nahin rah gai

badkari badhti jaati hai

jo din biit gae kitne achchhe the!

bargad ke niche baitho ya suuli chadh jaao

bhainse ladne se baaz nahin aenge

maut se ham ne ek taavun kar rakkha hai

sadkon par se har lamha ik mayyat jaati hai

pas-manzar men kya hota hai nazar kahan jaati hai

samne jo kuchh hai rangon avazon chehron ka mela hai!

gurgal ud kar vo pilkhan par ja baithi

pipal men tote ne bachche de rakhe hain

guldum jo pakdi thi kal be-chari mar gai

‘najma’ ke bele men kitni kaliyan aaen hain

phulon ki khushbu se kya kya yaad aata hai

ye jab ka qissa hai sadkon par nai nai bijli aai thi

aur mujhe siine men dil hone ka ehsas hua tha

iid ke din ham ne latthe ki shalvaren silvai thiin

aur sivayyon ka zarda ham-sae men bhejvaya tha

sab niche baithak men baithe the

main uupar ke kamre men baitha

khidki se ‘zainab’ ke ghar men phulon ke guchchhe phenk raha tha

kal ‘zainab’ ka ghar nilam ho raha hai

sarkari tahvil men tha ik muddat se

shayad patjhad ka mausam aa pahuncha

patton ke girne ki avaz musalsal aati hai

chechak ka tiika bimari ko roke rakhta hai

zabt-e-taulid isqat vaghaira

insani abadi ko badhne se rokengi

bandar ne jab se do tangon par chalna sikha

us ke zehn ne harkat men aana sikha hai

patton ke girne ki avaz musalsal aati hai

sadkon par roz nae chehre milte hain

maut se ham ne ek taavun kar rakkha hai

pas-manzar men nazar kahan jaati hai

phulon ki khushbu se kya kya yaad aata hai

chauk men jis din phuul pade sadte the

khuni darvaze par shahzadon ki phansi ka elaan hua tha

ye duniya lamha lamha jiiti hai

dilli ki galiyan vaisi hi abad shaad hain sab

din to kaale par vaale bagule hain

jo sab lamhon ko

apne pankhon men muund ke ankhon se ojhal ho jaate hain

charon janib rang rang ke jhande udte hain

sab ki jebon men insanon ke dukh-dard ka darman

khushiyon ka nuskha bandha pada hai

lekin aisa kyuun hai

jab nuskha khulta hai

1857 jaata hai

1947 aa jaata hai

Leave a Comment