na mere dil na jigar par na dida-e-tar par
karam kare vo nishan-e-qadam to patthar par
tumhare husn ki tasvir koi kya khinche
nazar thaharti nahin ariz-e-munavvar par
kisi ne li rah-e-kaaba koi gaya su-e-dair
pade rahe tire bande magar tire dar par
gunahgar huun main vaizo tumhen kya fikr
mira muamla chhodo shafi-e-mahshar par
un abaruon se kaho kushtani men jaan bhi hai
isi ke vaste khanjar khincha hai khanjar par
pila de aaj ki marte hain rind ai saaqi
zarur kya ki ye jalsa ho hauz-e-kausar par
salahiyat bhi to paida kar ai dil-e-muztar
pada hai naqsh-e-kaf-e-pa-e-yar patthar par
vafur-e-josh-e-ziya aur un ke danton ka
habab-e-gumbad-e-gardun hai ab-e-gauhar par
akhir vaqt hai ‘asi’ chalo madine ko
nisar ho ke maro turbat-e-payambar par