baghal men ham ne raat ik ghairat-e-mahtab dekha hai
tumhin is khvab ki taabir ho kya khvab dekha hai
tadap bijli ki bhi dekhi hai vo dil thaam lete hain
tiri be-tabiyon ko bhi dil-e-betab dekha hai
vo ulfat dost hon naseh dua hi dil se nikli hai
agar dushman ke ghar bhi majma-e-ahbab dekha hai
khuda ke samne ai mohtasib sach bolna hoga
mire saghar men mai dekhi hai ya khun-nab dekha hai
‘mubarak’ iztirab-e-shauq ka aalam nahin chhupta
ki jab dekha hai ham ne aap ko betab dekha hai
Leave a Reply