dil buton se na lagana hargiz
un ke phande men na aana hargiz
dil tujhe apni hai gar jaan aziiz
ku-e-qatil men na jaana hargiz
maang baiTha vo to dil dene men
nahin banne ka bahana hargiz
andaliban-e-chaman ko sayyad
fasl-e-gul men na satana hargiz
shikva-e-yar zaban par apni
dil ḳhabar-dar na laana hargiz
hadaf-e-tir nigah-e-qatil
murgh-e-dil ko na banana hargiz
is se vabasta hain dil lakhon ke
zulf men khincho na shana hargiz
rahne deta nahin insan ko yaan
ik vatire pe zamana hargiz
inqalab is men hai dam dam ai dil
is ka afsos na khana hargiz
gar ḳhuda de tujhe taufiq ai ‘aish’
dil kisi ka na dukhana hargiz
Leave a Reply