Raees Warsi
tere paikar si koi murat bana li ja.egi
dil ke bahlane ki ye surat nikali ja.egi
kaun kah sakta tha ye qaus-e-quzah ko dekh kar
ek hi anchal men ye rangat sama li ja.egi
kaghzi phulon se jab manus hongi titliyan
ashiqi ki rasm duniya se uTha li ja.egi
aa.ine men baal paḌ jaa.e to ja sakta nahin
ret ki divar to phir se bana li ja.egi
ham jo kar-e-azari men be-hunar Thahre to kya
un ki surat sher ke qalib men Dhali ja.egi
ḳhud-parasti ke nashe men jin ko hai zo.am-e-jamal
aa.ina dekhen to un ki ḳhush-ḳhayali ja.egi
ishq ki fitrat men hai parvan hi chaḌhna ‘ra.is’
husn vo daulat nahin jo phir kama li ja.egi
Leave a Reply