Poet
sang aata hai koi jab mire sar ki janib
dekh leta huun samar-bar shajar ki janib
is masafat ka koi ant nahin hai lekin
din nikalte hi main chal paḌta huun ghar ki janib
kis ne avaz mujhe sahil-e-jan se di hai
naav kyuun dil ki lapakti hai bhanvar ki janib
qissa-e-shauq ko us tishna-labi ka likhna
kar ke ik aur safar shahr-e-hunar ki janib
phir se angaron ka mausam mire andar utra
phir baḌha haath mira la.al-o-gohar ki janib
ye jo hai surat-e-halat badal sakti hai
kaash kar paanv safar ḳhair se shar ki janib
ain mumkin hai ki pathrata na koi ‘azmi’
tu ne dekha hi nahin muḌ ke nagar ki janib
Leave a Reply