ashk-dar-ashk vahi log ravan milte hain
ḳhvab ki ret pe jin jin ke nishan milte hain
mere divan ke mathe pe ye kis ne likkha
ḳhuun men bhige varaq saare yahan milte hain
main ne ik shaḳhs se ik baar yuun hi puchha tha
aap ki tarah hasin log kahan milte hain
ek muddat se use log ufuq kahte hain
ek muddat se ka.i dariya jahan milte hain
ek vo dil jahan mahbub raha karta hai
paas us dil ke kahin allah-miyan milte hain
jin nigahon men mohabbat ke makin hote hain
un nigahon men hi ḳhushbu ke makan milte hain
Leave a Reply