Arshad Abdul Hamid
ash.ar men jo mere kiran justuju ki hai
miras ye bhi tere hi mohar-e-numu ki hai
nazron men ab bhi hain tire lahje ke mah-o-najm
ab bhi sama.aton men chamak guftugu ki hai
teri pukar hai ki ye bunden hain os ki
avaz-e-naghma hai ki sada ab-ju ki hai
divar-e-zabt TuuT bhi sakti hai kuchh karun
favvara chhuT jaa.e vo halat lahu ki hai
yuun phuul to baraste na the ku-e-yar men
ye ham guzarte hain ki savari adu ki hai
pyason ko intiḳhab ki jur.at na koi haq
kya puchhiye huzur ye kis ke subu ki hai
‘arshad’ vo samne hi to hai shaḳh-e-dastaras
duuri bas ek jast-e-buland-arzu ki hai
Leave a Reply