Ada Jafarey
main ne gul-rez baharon ki tamanna ki thi
mujhe afsurda nigahon ke siva kuchh na mila
chand sahmi hui aahon ke siva kuchh na mila
jagmagate hue taron ki tamanna ki thi
main ne mauhum umidon ki panahen dhundin
shiddat-e-yas men mubham sa ishara na mila
dagmagate hue qadmon ko sahara na mila
haae kis dasht-e-bala-khez men rahen dhunden
ab fusun-saz baharon se mujhe kya matlab
aaj hi meri nigahon men vo manzar tauba
main ne dekhe hain lapakte hue nashtar tauba
khuld bar-dosh nazaron se mujhe kya matlab
asman nuur ke naghmat se maamur sahi
main ne ghatti hui chikhon ke sune hain nauhe
haae vo ashk jo palkon se dhalak bhi na sake
zindagi husn-o-javani se abhi chuur sahi
kabhi zau-pash sitaron ki tamanna thi mujhe
aaj zarron ko bhi maqsud bana rakkha hai
aaj kanton ko kaleje se laga rakkha hai
kabhi gul-rez baharon ki tamanna thi mujhe
Leave a Reply