ḳhud apni yaad dila ke rula diya hai mujhe
vo ek shaḳhs ki jis ne bhula diya hai mujhe
tire karam ka saza-var main raha jab tak
gham-e-hayat ne bhi rasta diya hai mujhe
hava-e-shauq ne teri talash men aksar
misal-e-barg-e-shikasta uḌa diya hai mujhe
zara si aankh lagi thi jo apni aḳhir-e-shab
hava-e-sub.h ne aa kar jaga diya hai mujhe
chaman men tu raha jab tak gulab ki surat
nasim-e-sub.h ne tera pata diya hai mujhe
ye apna apna muqaddar hai is ko kya kahiye
tujhe sarab to dariya bana diya hai mujhe
ba-rang-e-shisha tha pahle ab ek patthar huun
nazar se apni jo tu ne gira diya hai mujhe
ḳhayal-o-ḳhvab ki baten ḳhayal-o-ḳhvab huiin
shu.ur-e-zist ne jiina sikha diya hai mujhe
Leave a Reply