hamara raz-dan koi nahin hai
mohabbat ki zaban koi nahin hai
har ik ghuncha hai murjhaya hua sa
chaman men baghban koi nahin hai
qafas se chhut kar jaaen kahan ham
hamara ashiyan koi nahin hai
kahan jaaen ye darmanda musafir
amir-e-karvan koi nahin hai
andhere raste roke khade hain
charag-e-karvan koi nahin hai
hain pazhmurda tiri yadon ki kaliyan
bahar-e-javedan koi nahin hai
ibarat hai hayat-o-marg tum se
hamari dastan koi nahin hai
yahan har jins bik jaati hai ‘mumtaz’
sukhan ka qadr-dan koi nahin hai