Tauseef Tabassum
dil tha pahlu men to kahte the tamanna kya hai
ab vo ankhon men talatum hai ki dariya kya hai
shauq kahta hai ki har jism ko sajda kiije
aankh kahti hai ki tu ne abhi dekha kya hai
TuuT kar shaḳh se ik barg-e-ḳhizan-amada
sochta hai ki guzarta hua jhonka kya hai
kya ye sach hai ki ḳhizan men bhi chaman khilte hain
mere daman men lahu hai to mahakta kya hai
dil pe qaabu ho to ham bhi sar-e-mahfil dekhen
vo ḳham-e-zulf hai kya surat-e-zeba kya hai
Thahro aur ek nazar vaqt ki tahrir paḌho
reg-e-sahil pe ram-e-mauj ne likha kya hai
koi rahbar hai na rasta hai na manzil ‘tausif’
ham ki gard-e-rah-e-sar-sar hain hamara kya hai
Leave a Reply