Shifa Kajgavnwi
hava bhi garm hai chha.e hain surḳh badal kyuun
ye zulm kis pe hua roi ḳhak-e-maqtal kyuun
jo ḳhvab dekhti aa.i huun apne bachpan se
adhura ḳhvab vo hota nahin mukammal kyuun
jo aarzu thi ki hon ird-gard gul-buTe
to tum ne nag-phani ke ugaa.e jangal kyuun
ham apne shauq ki duniya men gum the kuchh aise
samajh na paa.e ki bhiga hai maan ka anchal kyuun
sukut se bhi samundar ke ḳhauf aata hai
hain kyuun ḳhamosh ye maujen nahin hai halchal kyuun
main jab sukun ki manzil se chand gaam pe huun
sada.en deta hai maazi mira musalsal kyuun
vo kaun apna ‘shifa’ yaad aa gaya tum ko
tumhari aankh hui ja rahi hai jal-thal kyuun
Leave a Reply