Safi Aurangabadi
haa.e us be-ḳhud-e-shabab ka rang
laal angara sa sharab ka rang
ho gaya ḳhuun hasrat-e-didar
de diya ashk ne shahab ka rang
us ki ḳhush-bu gulab ki ḳhush-bu
rang us shoḳh ka gulab ka rang
satyanas ho gaya dil ka
kya kahun us jale kabab ka rang
bijliyan dushmanon pe girti hain
dekh kar mere iztirab ka rang
vo sar-e-sham sair ko nikle
paḌ gaya zard aftab ka rang
us ke ruḳh par nikhar ga.i surḳhi
allah allah us hijab ka rang
maand hai rat-din tire aage
mahtab aur aftab ka rang
itni shoḳhi safi’ kisi men kahan
rang men rang to sharab ka rang
Leave a Reply