asir-e-hijr ki ab-o-hava badalne ko
kabhi ḳhushi bhi mile za.iqa badalne ko
mira hijab sulagta hai jis ki hiddat se
tum us nazar se kaho zaviya badalne ko
main tere shahar se nikli to muḌ nahin dekha
agarche log mile bar-ha badalne ko
main jis ke naqsh-e-qadam chumne ko nikli thi
usi ne mujh se kaha rasta badalne ko
hazar zaḳhm sahe aur phir yahi socha
chalo ik aur sahi tajraba badalne ko
gar us ka saath mile to sitare mil jaa.en
vo na-guzir hua za.icha badalne ko
mile hain ham kabhi phir se juda na hone ko
chalo ye farz karen faisla badalne ko
yahan pe ḳhud ko badalna hai gar badalna hai
so tum se kis ne kaha hai ḳhuda badalne ko
vo ḳhud to kho chuka duniya ki bhiiḌ men ‘iman’
mujhe bhi kah gaya apna pata badalne ko
Leave a Reply