yahi hai ishq ki mushkil to mushkil asan hai
mila hai dard vo dil ko jo rahat-e-jan hai
tiri nigah samajhti hai ya nahin dekhun
lab-e-ḳhamosh men koi saval pinhan hai
murad-e-zauq ḳharabi ki ab bar aa.egi
ki dil ki taak men vo chashm-e-fitna-saman hai
faragh-e-hauslagi par junun ki shahid hai
vo ek chaak jo daman se ta-gareban hai
ye be-ḳhudi hai mire aish-e-zindagi ki kafil
nigah-e-shauq abhi mahv-e-ru-e-janan hai
bala-kashon ki dua hai ki ai ḳhuda na miTe
jigar ka daagh ki chashm-o-charagh-e-hijran hai
hava hai shauq-e-suḳhan dil men mauj-zan ‘vahshat’
ki ham-safir mira ro.ab sa suḳhan-dan hai
Leave a Reply