vo jise dida-vari kahte hain
ham use be-basari kahte hain
naam us ka hai agar ba-khabari
phir kise be-khabari kahte hain
ye agar lutf-o-karam hai to kise
jaur-o-be-dad-gari kahte hain
kya isi kar-e-nazar-bandi ko
husn ki jalvagari kahte hain
gul ke auraq pe kanton ka guman
kya ise khush-nazari kahte hain
bahr-e-bimar dava hai na dua
kya ise charagari kahte hain
kam kisi ko ye khabar hai ki kise
ranj-e-be-bal-o-pari kahte hain
yas-o-hirman ko ba-alfaz-e-digar
aah ki be-asari kahte hain
naam hai vo bhi jigar-dari ka
ham jise be-jigari kahte hain
aap khud bhi to gul-andamon ko
huur kahte hain pari kahte hain
fasl-e-gul hi to hai vo ham jis ko
mausam-e-jama-dari kahte hain
ishq men ain hunar-mandi hai
sab jise be-hunari kahte hain
muft ki dard-sari ko ham bhi
muft ki dard-sari kahte hain
aap se ham se bani hai na bane
aap khushki ko tari kahte hain
kya koi baat kabhi ahl-e-junun
az-rah-e-nam-vari kahte hain
ham pe ye bhi hai ik ilzam ki ham
dastan dard-bhari kahte hain
koi khush ho ki khafa ho ‘hairat’
ham to har baat khari kahte hain
Leave a Reply