kahan din raat men rakkha hua huun
ajab halat men rakkha hua huun
ta.alluq hi nahin hai jin se mera
main un ḳhadshat men rakkha hua huun
kabhi aata nahin tha haath apne
ab apne haath men rakkha hua huun
zara bhi rah nahin sakta huun jin men
main un jazbat men rakkha hua huun
jala.e kis tarah ye dhuup mujh ko
kahin barsat men rakkha hua huun
ḳhamoshi kah rahi hai ‘shaz’ us ki
main us ki baat men rakkha hua huun
Leave a Reply