Muneer Saifi
aisi bhi surat-e-halat na samjhi jaa.e
meri paspa.i miri maat na samjhi jaa.e
ye to raste mujhe le aa.e hain teri janib
ye mulaqat mulaqat na samjhi jaa.e
ba.az auqat main nashshe men nahin bhi hota
meri har baat miri baat na samjhi jaa.e
ab to sahra bhi mire saath safar karte hain
sirf vahshat hi mire saath na samjhi jaa.e
faisle saare kahin aur hua karte hain
meri rusva.i mire haath na samjhi jaa.e
vaqt aane pe gala apna daba sakta huun
itni kamzor miri zaat na samjhi jaa.e
Leave a Reply