Tariq Naeem
tujh ko is tarah kahan chhoḌ ke jaana tha hamen
vo to ik ahd tha aur ahd nibhana tha hamen
tum to us paar khaḌe the tumhen ma.alum kahan
kaise dariya ke bhanvar kaaT ke aana tha hamen
un ko le aaya tha manzil pe zamana lekin
ham chale hi the ki dar-pesh zamana tha hamen
vo jo ik baar uTha laa.e the ham ujlat men
phir vahi baar har ik baar uThana tha hamen
vo to aisa hai ki mohlat na mili thi varna
apni barbadi pe ḳhud jashn manana tha hamen
Leave a Reply