Poet
raz-e-dil dost ko suna baiThe
muft men mudda.i bana baiThe
anjuman hai tiri tilism-e-rashk
ashna hain juda juda baiThe
kasrat-e-sajda se pasheman hain
ki tira naqsh-e-pa miTa baiThe
kal jo taj-o-hasham ko chhoḌ uThe
aaj vo tere dar pe aa baiThe
ki hai aḳhir ko nashta-shikni
daagh par daagh ham to kha baiThe
tarz-e-saqi se dair ke sab log
kar rahe hain ḳhuda ḳhuda baiThe
shaḳh-e-gul ki nazakaton se Dare
baar the musht-e-par uḌa baiThe
shikva ashiq-kushi ka farz na tha
yaad ye kya unhen dila baiThe
dard-e-sar thi dua mohabbat men
haath ham jaan se uTha baiThe
ai qayamat tu uTh ke puchh mizaj
hain vo kuchh aap hi ḳhafa baiThe
ro.e itne ki ḳhuun hui ummid
ḳhud jahaz apna ham baha baiThe
be-takalluf maqam-e-ulfat hai
daagh uTThe ki aabla baiThe
asman Dah paḌa uThe fitne
jis jagah le ke mudda.a baiThe
rasm-e-tazim-e-ishq to dekho
dard uTTha ki ji mira baiThe
ai ‘qalaq’ tum sa bad-dimagh hai kaun
charḳh ki zid pe ghar luTa baiThe
Leave a Reply