Raghunandan Sharma Danish
raushni thi tum the ya ḳhud mera saaya kaun tha
roz mere ḳhvab men aa kar bikharta kaun tha
vo to raghbat ho ga.i hai naḳhuda tujh se mujhe
varna teri kashtiyon men aata jaata kaun tha
maan luun teri ki main ik sang-dil huun par bata
ban ke aansu ye mire andar pighalta kaun tha
shor sa uTha tha mujh men ḳhamushi ke bavajud
mere andar ai ḳhuda mere alava kaun tha
mujh se pahle kis ko meri manzilen hasil huiin
dekhna hai mere pichhe pichhe chalta kaun tha
Leave a Reply