Be-Khudi Mein Ajab Maza Dekha

be-khudi men ajab maza dekha

sirr-e-makhfi ko barmala dekha

aap hi gul hi aap hi bulbul

us ko har rang-ashna dekha

kahta hai aap samjhe bhi hai aap

us ko har shai men khud-numa dekha

surat-e-qais main hua majnun

shakl-e-laila men khushnuma dekha

aap hi ban ke iisa aur murda

aap hi aap ko jila dekha

ho bar-afrokhta ba-surat-e-shama

shakl-e-parvana men jala dekha

saghar-e-be-khudi se ho sarshar

ham ne har shai men ab khuda dekha

alam-e-ishq men kahen kya ham

jalva-e-husn ja-ba-ja dekha

faiz-e-khadim safi se ai ‘asim’

us ko dekha jise na tha dekha

Leave a Comment