Syed Mohammad Askari Arif
maut hai zindagi zindagi maut hai
har-nafas maut hai har ghaḌi maut hai
main andheron men kho ja.un mumkin nahin
ek parvane ki raushni maut hai
is liye shaad rahta huun har haal men
mere dushman ko meri ḳhushi maut hai
koi talvar ḳhanjar na tir-o-tabar
hurmula ke liye ik hansi maut hai
ḳhamushi aqilon ki hai ḳhubi magar
ba.az auqat par ḳhamushi maut hai
sabiron ke liye har taraf hai hayat
zalimon ke liye maut hi maut hai
ek kaḌvi haqiqat kahen aur kahen
shahd se bhi siva chashni maut hai
qaid-e-ghurbat se ‘arif’ nikal ja.iye
hai ḳhabar aap ko muflisi maut hai
Leave a Reply