ehtiram-e-lab-o-rukhsar tak aa pahunche hain
bul-havas bhi mire meaar tak aa pahunche hain
jo haqaeq the vo ashkon se ham-aghosh hue
jo fasane the vo sarkar tak aa pahunche hain
kya vo nazron ko jharoke men muallaq kar den
jo tire saya-e-divar tak aa pahunche hain
apni taqdir ko rote rahen sahil vaale
jin ko aana tha vo manjdhar tak aa pahunche hain
ab to khul jaega shayad tiri ulfat ka bharam
ahl-e-dil jurat-e-izhar tak aa pahunche hain
ek tum ho ki khuda ban ke chhupe baithe ho
ek ham hain ki lab-e-dar tak aa pahunche hain
Leave a Reply