chand taare jise har shab dekhen
ham bhi us shoḳh ko yarab dekhen
yuun milen un se ki apna chehra
vo bhi hairan huun kal jab dekhen
pahle bas dil ko ḳhabar thi dil ki
ab vafa aam hui sab dekhen
qurb men kya hai jo duuri men nahin
tum jo aao to kisi shab dekhen
ji men hai phir karen iz.har-e-vafa
phir tire larze hue lab dekhen
main ki huun ek hi ashufta ḳhayal
log har baat men matlab dekhen
jo kisi ne kabhi dekhe na sune
vo tamashe vo fusun ab dekhen
aaj to yuun gale lag jaao ki bas
phir to jaane tumhen kab kab dekhen
laakh patthar sahi vo but ‘anjum’
vo ghaḌi ham se mile tab dekhen
Leave a Reply