Poet
kabhi jo rahte the is shahar men ḳhuda ki tarah
vo miT ga.e hain mire naqsh-ha-e-pa ki tarah
kahan tha hosh ki main arz-e-mudda.a karta
guzar ga.e vo mire paas se hava ki tarah
dhyan tak na diya mere ham-nashinon ne
main gunjta raha sahra men ik sada ki tarah
vo jin ki yaad ki ḳhushbu mujhe satati hai
base hue hain mire zehn men saba ki tarah
vafa ki riit hamesha se kuchh nirali hai
jaza bhi milti hai is raah men saza ki tarah
kabhi to aao ki dil ko qarar aa jaa.e
chale bhi aao kisi roz to qaza ki tarah
Leave a Reply