Fauziya Rabab
tum ne puchha hai to ahval bata dete hain
varna chehre bhi mah-o-sal bata dete hain
ruuh ka haal bhi ai kaash bata.e koi
dil ki halat to ḳhad-o-ḳhal bata dete hain
ab marasim bhi bisaton pe saje mohre hain
kaun si kis ne chali chaal bata dete hain
kis men ab kitni uḌanon ki sakat baaqi hai
har parinde ke par-o-bal bata dete hain
dil ke ghunche bhi the ma.asum hamare jaise
kis ke hathon hue pamal bata dete hain
hakim-e-vaqt ko kis kis ne salami di hai
kis ki taali men hai sur-tal bata dete hain
ghar ki divar se girte hue roghan ki tarah
ab miri umr mire baal bata dete hain
Leave a Reply