Jamal Ehsani
umr guzri jis ka rasta dekhte
aa bhi jaata vo to ham kya dekhte
kaise kaise moḌ aa.e raah men
saath chalte to tamasha dekhte
qarya-qarya jitna avara phire
ghar men rah lete to duniya dekhte
gar baha aate na dariyaon men ham
aaj un ankhon se sahra dekhte
ḳhud hi rakh aate diya divar par
aur phir us ka bhaḌakna dekhte
jab hui ta.amir jism o jaan to log
haath ka miTTi men khona dekhte
do qadam chal aate us ke saath saath
jis musafir ko akela dekhte
e’tibar uTh jaata aapas ka ‘jamal’
log agar us ka bichhaḌna dekhte
Leave a Reply