barham-zan-e-shiraza-e-ayyam hamin hain
ai dard-e-mohabbat tira anjam hamin hain
is qafila-e-shauq men ye vahm hai sab ko
avara-o-sar-gashta-o-nakam hamin hain
honge ka.i gardan-zadani aur bhi lekin
is shahr-e-nigaran men to badnam hamin hain
ham dhuup men tapte to panap jaate magar ab
daryuza-gar-e-mehr-e-lab-e-bam hamin hain
kya aan thi nakami-e-tadbir se pahle
ab la.eq-e-fahma.ish-e-dushnam hamin hain
haq naqd-e-masarrat ka agar hai to hamin ko
kuchh nabz-shanas-e-gham-o-alam hamin hain
jis tak koi koi abhi pahuncha hi nahin hai
vo mash.al-e-be-nur sar-e-sham hamin hain
inkar hi sar-chashma-e-iman-o-yaqin hai
ab roz-e-jaza la.eq-e-in.am hamin hain
kaliyon se dam-e-sub.h jo ‘zaidi’ ne suna tha
fitrat ka vo na-gufta sa paigham hamin hain
Leave a Reply