Dil Ke Daghon Mein Sitaron Ki Chamak Baqi Hai

dil ke dāġhoñ meñ sitāroñ kī chamak baaqī hai

shab-e-furqat abhī do-chār palak baaqī hai

surḳh hoñToñ ke diye zehan meñ raushan haiñ abhī

abhī afkār meñ zulfoñ kī mahak baaqī hai

bāzuoñ meñ tire paikar kī latāfat raqsāñ

uñgliyoñ meñ tirī bāhoñ kī lachak baaqī hai

qasr-e-parvez meñ gum ho ga.ī shīrīñ kī sadā

dāman-e-koh meñ teshe kī dhamak baaqī hai

sarsar-e-jaur ne har-chand ḳhizāñ bikhrā.ī

phuul meñ aag shagūfoñ meñ lahak baaqī hai

gul khilā.egī abhī aur na jaane kyā kyā

ye jo pahlū meñ mahaktī sī kasak baaqī hai

Leave a Comment