Sim-O-Zar Chahe Na Almas-O-Guhar Mange Hai

Nau Bahar Sabir

sim-o-zar chahe na almas-o-guhar mange hai

dil to darvesh hai ulfat ki nazar mange hai

jab ghazal mujh se koi misra-e-tar mange hai

kavish-e-fikr mira ḳhun-e-jigar mange hai

dil ko hai afiyat-e-anjuman-e-gul ki talab

zindagi dasht-e-mughilan ka safar mange hai

mujh ko le jaa.e jo anjane dayaron ki taraf

meri avara-mizaji vo Dagar mange hai

apne mahaul se har shaḳhs hai ma.il-ba-farar

koi bezar hai ghar se koi ghar mange hai

the jo rangini-e-daman-e-nazar ka saman

dida-e-shauq vahi sham-o-sahar mange hai

kal bhi jan-baz hi karte the nigah-dari-e-haq

ye junun aaj bhi nazrana-e-sar mange hai

ho jahan aib-shumari hi parakh ka mafhum

sabir us shahr men kya dad-e-hunar mange hai