ahmad-ali-barqi-azmi

Wo Hasb-e-Wada Na Aaya To Aankh Bhar Aai

vo hasb-e-vaada na aaya to aankh bhar aai

mujhe tamasha banaya to aankh bhar aai

saja ke rakhta tha palkon pe jis ko main aksar

nazar se us ne giraya to aankh bhar aai

hamesha karta tha meri jo naz-bardari

isi ka naaz uthaya to aankh bhar aai

jise samajhta tha main dil-navaz jab us se

sukun-e-qalb na paaya to aankh bhar aai

vo mujh se bharta tha dum dosti ka lekin jab

adu se haath milaya to aankh bhar aai

na tha ye vahm-o-guman mujh ko vo bulaega

achanak us ne bulaya to aankh bhar aai

nahin hai shikva koi dushmanon se ai ‘barqi’

fareb dost se khaya to aankh bhar aai

More Poems

Leave a Comment