jise nazron ki surat apni ankhon men basaya tha
usi ik khvab ne har mod par mujh ko rulaya tha
tire ik qahqahe ne jis ko ik pal men gira daala
gharaunda vo to main ne apne ashkon se banaya tha
khushi se udte udte aa gae is shakh par bhanvre
jahan kanton ne us ki maut ka saman sajaya tha
sitara ye zamin bhi asman ka ek tukda hai
jise roz-e-azal shayad khuda ne azmaya tha
mere honton pe ‘bina’ muskurahat yuun machalti thi
ki main ne hasraton ko apne sheron men chhupaya tha
Leave a Reply