Shiv Om Misra Anvar
kabhi qarib kabhi duur se guzarte hue
azaab dete hain kuchh log mere barte hue
qarib paani ke jaana nahin kisi surat
vasiyyat aag ne ki thi sharar ko marte hue
bana hai jab se mira jism hairaton ka maqam
main dekhta huun jahan men sabhi ko Darte hue
yatim lagne laga ishq mera mujh ko ḳhud
main ro paḌa huun nazar se tiri utarte hue
hua hai ranj mujhe raat ki nahusat ka
ki ḳhvab duur hue TuuT kar bikharte hue
hamari ankhon pe ḳhali nigah rakhta hai
vo aa.ine ko nahin dekhta sanvarte hue
ḳhayal yunhi hai ik guzra be-ma.ani sa
dil-o-dimagh mira be-qarar karte hue
vahi hai ishq purana ise naya na kaho
jhijhak rahe hain jahan log paanv dharte hue
vo mere TuuTe marasim ka naqsh-e-aḳhir tha
ki tham ga.e hain mire haath rang bharte hue
Leave a Reply