Yazdani Jalandhari
tanha.i men aksar yahi mahsus hua hai
jis tarah koi meri taraf dekh raha hai
DhunDa koi sathi jo kabhi dasht-e-vafa men
ik apna hi saaya mujhe har baar mila hai
siine men hai mahfuz mata-e-gham-e-dauran
dibacha-e-ayyam mire dil pe likha hai
aahaT si shab-e-gham jo tujhe di hai suna.i
ai dil vo tire apne dhaḌakne ki sada hai
ho ḳhair charaghan-e-sar-e-rahguzar ki
sunte hain bahut tez zamane ki hava hai
yak-rang kahan hoti hai insan ki fitrat
har phuul ki ḳhushbu hai alag rang juda hai
maghrur na ho husn pe a sham-e-farozan
parvane ki ankhon men koi aur ziya hai
niind aati hai yazdani-e-muztar ko sakun se
ye maut hai ya dost ke daman ki hava hai
Leave a Reply