ab kahan us ki zarurat hai hamen
ab akele-pan ki aadat hai hamen
dekhiye ja kar kahan rukte hain ab
teri qurbat se to hijrat hai hamen
saans leti ek ḳhushbu hai jise
vird karne ki ijazat hai hamen
dil-jazire par hai us ki raushni
ik sitare se mohabbat hai hamen
ab zara sargoshiyon men baat ho
mehrban lahje ki aadat hai hamen
phir usi chaukhaT ki dil ko hai taḌap
phir usi dar par sukunat hai hamen
ham tahayyur khol denge aankh se
ki mayassar teri qurbat hai hamen
Leave a Reply