Sajid Sajni
us ne kuchh kaan men chupke se kaha raat ga.e
main ne sab sun ke bhi jaise na suna raat ga.e
aaj bhayya ne ḳhuda jaane khila di kya shai
paani bhabi ne ka.i baar piya raat ga.e
kya kahenge mujhe batlao mohalle vaale
tum ko aate hue gar dekh liya raat ga.e
main vahan ja ke paḌha karti huun aksar bhabi
achchhi lagti hai khuli chhat ki hava raat ga.e
haath tauba ko ka.i baar uTha.e main ne
yaad aaya hai ka.i baar ḳhuda raat ga.e
aaj vo aa ga.e pardes se vapas ‘sajni’
main nai kal raat ko mangi thi dua raat ga.e
Leave a Reply