Abrar Ahmad
jaane kin rahguzaron se
daude chale aate hain
lashen bhanbhodte, bu sunghte
baith gae hain log
ki baithe huon ko katte nahin!
virani ke aqab men
raston aur shah-rahon ke kohram
aur jalti-bujhti raushniyon ke taaqub men
phate hue halaq ke saath
gadiyon ke saath saath bhagte hain
divar par
taang utha chukne ke baad
muaaf kijiyega
fatah-ali-khan sahib!
aap ka alap, kanon men jam gaya hai
murkiyan tutti hain
ham rukhsat ho rahe hain
jiine ke javaz se dast-bardar
patakhon se patlunen bachate
phudakte phirte hain
hamari qaumi mausiqi
kafur ki mahak se bhi khali hai
sadand hai chahar janib
aur bhunkne ki avazen
be-sur, be-tal
jaan ki amaan paun
to sidha aap hi ki taraf aunga!
Leave a Reply