chhodo ab us charagh ka charcha bahut hua
apna to sab ke hathon khasara bahut hua
kya be-sabab kisi se kahin uubte hain log
bavar karo ki zikr tumhara bahut hua
baithe rahe ki tez bahut thi hava-e-shauq
dasht-e-havas ka garche irada bahut hua
akhir ko uth gae the jo ik baat kah ke ham
sunte hain phir usi ka iaada bahut hua
milne diya na us se hamen jis khayal ne
socha to is khayal se sadma bahut hua
achchha to ab safar ho kisi aur samt men
ye roz-o-shab ka jagna sona bahut hua
Leave a Reply