Kachche Rang Utar Jaen to Sab Kuchh Yunhi Lagta Hai

kachche rañg utar jaa.eñ to sab kuchh yūñhī lagtā hai

saare ḳhvāb bikhar jaa.eñ to sab kuchh yuuñ hī lagtā hai

ret kā Dher nazar aate haiñ shahr ke saare puḳhta ghar

chīḳhoñ se dil Dar jaa.eñ to sab kuchh yūñhī lagtā hai

talvoñ meñ siine kī dhaḌkan hoñToñ par muddat kī pyaas

jab ham ”jān-nagar” jaa.eñ to sab kuchh yūñhī lagtā hai

bhīge bhīge chāñd sitāre shabnam rut niilā ākāsh

us ke baal sañvar jaa.eñ to sab kuchh yūñhī lagtā hai

kursī mez kitābeñ? bistar anjāne se takte haiñ

der se apne ghar jaa.eñ to sab kuchh yūñhī lagtā hai

TuuTī kashtī duur kinārā zehn meñ kuchh guzre qisse

ham jab biich bhañvar jaa.eñ to sab kuchh yūñhī lagtā hai

Leave a Comment