Marghoob Asar Fatmi
kisi ko dard sunana bhi kitna mushkil tha
mazaq apna uḌana bhi kitna mushkil tha
haqiqaton pe hasin parda Dalne ke liye
fusun ka jaal bichhana bhi kitna mushkil tha
kabhi raha tha jin ankhon ka ban ke surma main
unhin se aankh churana bhi kitna mushkil tha
vo lan-tarani men tha mahv aankh band kiye
so us ko shisha dikhana bhi kitna mushkil tha
gulon men ki vo laga.i bujha.i sarsar ne
chaman ki laaj bachana bhi kitna mushkil tha
‘asar’ ḳhalal ke sharare the dasht-o-sahra men
sukun ka ḳhema lagana bhi kitna mushkil tha
Leave a Reply