vahi din hai ḳhauf-o-hiras ka vahi haal abhi bhi hai pyaas ka
vahi shaam bistar-e-marg si vahi silsila shab-e-yas ka
vahi as.man hai vahi faza vahi nashsha shaam pe hai bapa
vahi duur shahr se hai jagah vahi sabz farsh hai ghaas ka
na rahe bashir-o-nazir ham na rahe fahim-o-basir ham
na dikha.i deta hai duur ka na nazar hi aata hai paas ka
tujhe chahiye jo koi ḳhabar miri kavishon men talash kar
mira e’tibar hai aql par main asiir kab huun qayas ka
jo ghina ke suut se ho bana jo raza ki suui se ho sila
jo ranga ho shukr ke rang se mujhe shauq aise libas ka
Leave a Reply